22. mai opnar vi separatutstilling med kunstnaren Per Grøtting, busett i Florø. Utstillinga står til søndag 13. juni.

Per er født og oppvaksen i Dale i Vaksdal kommune men har budd i Sogn og Fjordane frå 1977. Han starta undervisning på Heimyrkjeskulen i 1977 og  var lærar der fram til 1989. Etter det har han undervist i kunstfag i Florø, fram til 2015.

Per arbeider både figurativt og abstrakt og eksperimenterer gjerne med materialar og teknikkar. Han nyttar i hovudsak akrylbasert maling, ofte saman med bladgull.

I veggskulpturane – som er på preparerte heiltreplater – nyttar han i tillegg blandingar av betong og akrylmasse. Slik  modellerer han fram enkle skulpturelle former, gjerne omkransa av krakelerte flater med fargekontraster.  Kombinasjonen av utforming, krakelerte flater og  bladgull gir enkelte av veggskulpturane eit sakralt uttrykk.